الخميس، 18 نوفمبر 2010

كلام القهاوى


كلام القهاوى

دخلت أنا وصديقى الانتيم على القهوة وهى مكان مزدحم جدا لا تسمع فيه إلا صوت الراديو أو التليفزيون ومناقشات بصوت شديد الارتفاع ، ضحكات نكات قفشات رزع الدمينو على الترابزة وكأن اللاعبين فى تحدى وأرهاب لمن يلاعبونهم وأيضا أهم صوت تسمعه فى هذا المكان " واحد شاى على ميه بيضا " .
بحثت عن مكان نتوارى فيه أنا وصديقى عن زحام الشارع وحركة السيارات المسرعة بجوار الرصيف ، قابلنى عامل القهوة بالترحاب .. اتفضل يا باشا .. طبعا كلمة يا باشا دى للى بيدفع بقشيش اى بقشيش المهم يدفع .. ماشى يا " عصفور " نجلس فين .. عصفور ده اسمه اطلق عليه من سرعة تلبيته للطلبات .
جلست وصديقى فى احد اركان القهوة أو كما يحب ان يسميها صاحبها " كافيتريا " المهم اننا ونحمد الله قد عثرنا على هذا المكان . فالقهاوى هى النادى الاجتماعى للغلابة وانتم عارفين اننى لا أملك اشتراك نادى اجتماعى . ما علينا متفكرونيش . جلست وبدأت عينى تلف ارجاء المكان ويدى ترتفع تلقائيا لإلقاء التحية على الرواد المنتظمين المواظبين على التواجد فى هذه المواعيد من اليوم .
 تشربوا ايه ؟ ولا زى كل يوم ؟... دى كلمات عصفور لازم يقولها واحنا لازم نقوله " زى كل يوم " فينظر إلينا وفى نفسه يقول ما تغيروا . فكيف لنا التغيير هو اللى معانا على قد كباية الشاى وحجرين المعسل . المهم نبدأ بالتعايش مع جو القهوة وذلك بالتركيز على ما يقوله الراديو من أخبار أو اغانى وهناك من ينادى ويطلب اغلاقه لفتح التليفزيون . وامسكت الجريدة الموجودة على ترابيزة جارى ... لو سمحت فأومئ لى برأسه بالموافقة . وحتى لو مسمحش فهى خلاص معى وبدأت اتصفح الصفحة الاولى وانتم عارفين فيها ايه طبعا " اكاذيب ووعود وضحك على الدقون " وانجازات ووصايا وتوجيهات ومنفذين للتوجيهات مش عارفين هم بيعملوا ايه المهم يقولوا احنا عملنا حسب التوجيهات .
تلمع يا استاذ .... البية البوهيجى بيقولى المع ولمواخذه الجزمة ، طبعا ودن من طين وودن من عجين وهو مش عاوز يمشى إلا لما اقول لسيادته ماشى أو شكرا وعشان انا عارف رخامته صحت فيه يا عم انا بلمعها فى البيت خلاص يا سيدى . ورجعت لصفحات الجريدة احاول الاقى خبر يفرحنا انا والوليه اللى فى البيت . مافيش فايده جائنى صوت صديقى ، ياعم اسمع الكلام مافيش فايدة . ليه التشاؤم ده يا اخى كل جملة على لسانك تسبقها بكلمة مافيش فايدة ...!!! أنت شايف احنا اهو عملنا ايه ... وده كلام صديقى .. ، أحنا بقالنــ ..................
بدأت أبحر فى الجريده واغوص اكثر حتى تنغمس رأسى وأذناى بين أوراقها وكلماتها التى ليس بها مفيد حتى يخف صديقى من حديثه اليومى عن احوالنا واحوال البلد واللى بيحصل فيها واللى بيحصل لينا ...... زمان كان الكلام ده يقال فى التجمعات الشبابية والوطنية وكانت الناس بتسمع وتستجيب والآن ما بيدنا إلا الجلوس على القهاوى والتنفيس عما بداخلنا ... وأقول لكم الحق انا مبرضاش حتى اقول اللى فى قلبى لانه فى الأخر كــلام قهــاوى


Mohamed Ashri


هناك 8 تعليقات:

  1. كلام قهاوي
    أكيد في فايدة
    وإلا تبقى الحياة مالهاش لازمة

    تقديري لك ماستر

    ردحذف
  2. انا طبعاً مبقعدش على قهوه

    لكن في اعتقادي انك لو عايز تسلي نفسك لازم تقعد على قهوه

    هتلاقي ناس بتقول اخبار واشاعات غريبه ومختلفه الذوق

    اللي بيتكلم في الفن

    واللي بيتكلم في الرياضه

    واللي بيتكلم في السياسه

    بس كويس انك لغاية دلوقتي معاك حق كوباية الشاي

    على ما اعتقد ان سعر الكوبايه غلي بعد ما السكر ارتفع

    بعد كده هتروحوا القهوه تقعدوا وبس هههه


    بجد البوست دمه ظريف اوي ومش عارفه ليه وانا بقراه افتكرت قهوه المعلم زينهم السماحي في ليالي الحلميه

    مشكور ماستر على البوست

    ردحذف
  3. حكاوي القهاوي تاخد منها بهريز الحياة اليومية ( حوة بهريز دي معدتي قلبت من اول العيد والناس مبطلتش شوربة وفتة ولحمة ..........انا بقى بطلت اقرا جرايد ويوم ما باقرأها بيجلي اكتئاب قوم ايه قعدت عالفيس بوك لقيت انه اصعب من القهاوي والجرايد كل شوية خبر يوجع وخبر يلطم وربي يغير حالنا بدل ما يستبدلنا

    ردحذف
  4. أمل
    كلام القهاوى كان يمكن يكون له فايده لو طلعنا منه بحاجة تصلح الحال
    لكن الكلام كتر والفعل قل
    شكرا لك وتحية خالصة من القلب

    ردحذف
  5. د. ولاء
    السكر غلى فعلا واكيد كوب الشاى كمان سعرة ارتفع
    لكن هناك الكثيرون مصممون على الجلوس على القهو لانها كما قلت النادى الاجتماعى للغلابة
    لكن شوية شوية هنتفرج عليها فى الفيديو وبلاها قعده
    ههههههههه
    انا مبسوط ان الكلام عجبك فشكرا لك سيدتى

    ردحذف
  6. كلمات
    بطلى اكل .. الرحمة يا ستنا
    الخروف اشتكى
    ههههههههههه

    سيدتى
    للأسف كلام الجرائد مكرر وكله منسوب للحاكم وتوجيهاته طبعا الجرائد الحكومية او بالمعنى الاصح الجرائد المغلوبة على أمرها لانها تحت وصايه النظام
    شكرا مرورك سيدتى

    ردحذف
  7. السلام عليكم ورحمة الله وبركاته
    أولاً أحييك على رسمك الرائع لهذا المقهى
    وسيناريو الأحداث اليومية....

    لكن يظل الكلام بداية الفعل حتى لوكان كلام قهاوى
    تقبل تقديرى واحترامى

    ردحذف
  8. استاذى العزيز / محمد بك الجرايحى
    بجد لى ان افتخر ان ما سطرته قد نال اعجاب شخصية مميزة مثلكم
    اما عن كلام القهاوى وتفعيله .. والله اتمنى ذلك
    لك امتنانى وتحياتى

    ردحذف

back to top